Pasa Páxina

UN CONTO CHINO

2012-02-06T11:09:00.000+01:00

O venres 3 de febreiro celebramos o ano novo chinés ao grande:
Escoitamos unha lenda na que se fala dos animais que forman o horóscopo chino, e especialmente a historia do nacemento do dragón (龙 ), porque este é o seu ano.

Os ratos de biblioteca temos familia por todo o mundo, así que un primo meu que vive na China, conseguíunos unha contadora de contos daquel país, 吴桂凤, que coas nosas letras escríbese
Wu GuiFeng

Marisol e 吴桂凤 léronnos en chino e en galego mentres víamos as fermosas ilustración que acompañan o texto.
非常感谢 (moitas grazas)

OLÍMPICAMENTE...OLÍMPICA...MENTE...UNHA MENTE OLÍMPICA.

2012-02-06T09:56:00.000+01:00

Nesta escola facemos as cousas olímpicamente. Non pasando, senon traballando, investigando, aprendendo... Así que vos propoño conseguir a medalla olímpica do coñecemento. Aquí tedes un proxecto que vos fará sentir coma os antigos gregos e disfrutaredes do que significa o espirito olímpico, e, por suposto e coma sempre O IMPORTANTE É PARTICIPAR.

Lede con atención o que aquí vos deixo:

A CELEBRACIÓN DO DÍA DA PAZ NO COLE

2012-02-01T16:19:00.000+01:00

NOVO ANO, NOVAS ILUSIÓNS, MÁIS EMOCIÓNS...

2012-01-23T12:18:00.000+01:00

O martes, 17 de xaneiro, os nenos e nenas de infantil e 1º ciclo de primaria, foron ao MACUF.
Alí tiveron a ocasión de transformar os seus medos en chocolate, e despois comelos.

Foron uns ¡SABOROSOS SUSTOS!

Tamén as profes do museo, mostráronlles unha exposición con obras de artistas actuais na que se mostraban os seus medos.

Saímos do museo sendo moito máis valentes.

O venres 20 de xaneiro, na hora do conto, os nosos amigos de Kalandraka, Patricia e Alex e o seu acordeón, viñeron contarnos as historias do elefante Pancho, da Familia C e dun mago moi singular, un mago que garda soños...nunha caixa de cristal, o Mago Goma.

Aquí vos deixo as imaxes dese día e os marabillosos libros que gardan as súas andanzas.

UNHA FESTA EN FEMININO E SINGULAR!!

2012-01-13T10:48:00.000+01:00

O día 21 de decembro tiven ocasión de comprobar canto e de que maneira, aprenderon as nenas e nenos do colexio todo o que lles propuxen no caderniño de traballo.
Así que, para comezar ben o día, regaleilles unhas carpetiñas para protexer este e futuros proxectos.

A media mañá, comezaron a chegar as familias, mamás , avoas, papás, avós, padriños..., e algún que outro recen nacido irmanciño .
Todos nervosos, concentrados, ilusionados, os alumnos demostraron que como artistas non teñen parangón no panorama audiovisual galego e parte do estranxeiro.
Aquí están as fotos que o demostran.

Unha vez pasadas as vacacións, vou comezar a pensar no próximo proxecto.... ¡idevos preparando!

CONVIDADOS QUEDADES!

2011-12-12T10:04:00.000+01:00

Para rematar co tema Feminino Singular que foi o escollido para este trimestre, faremos unha festa adicada a todas as mulleres, e demáis membros das familias. Os nenos contaranvos todo o que aprenderon e poñerán todo o seu entusiamo e o seu arte para que o pasedes estupendamente.

Quedades todos convidados!

UNHA CIENTÍFICA... ÁNGELES CID

2011-12-05T10:59:00.001+01:00

O venres 2, visitounos unha muller cun traballo moi interesante. É bióloga e profesora na universidade .

E temos que dicir que é unha gran ensinante, porque a súa explicación foi a un tempo divertida e instructiva, e deixounos con gañas de saber moito máis.
Falounos dos microbios, que é a súa especialidade, e tróuxonos mostras dos cultivos cos que investiga, e para rematar, leunos un conto moi especial: o seu autor é un premio Nobel, que lle contaba desta maneira ao seu fillo como son os microbios.

E foi tan estupenda con nós que nos regalou o libro e algúns cultivos para que os miremospolo microscopio.

ALGÚN DESTES NENOS SERÁN CIENTÍFICOS E ATA TEREMOS ALGÚN PREMIO NOBEL
(palabra de Rato)

TRABALLANDO CON ROSALÍA...

2011-11-28T12:44:00.000+01:00

Estou abraiado vendo con que entusiasmo están os nenos do colexio aprendendo cousas de Rosalía de Castro.

O venres 25, a rapazada de 1º ciclo deu unha clase maxistral, explicando a vida da nosa autora máis querida e recitando algunha das súas poesías.

Nesta foto podedes ver aos artistas co cartel que anunciaba a súa actuación, e o orgullosos que quedaron cos aplausos recibidos.

E tamén os de 3º ciclo , decidiron facer de poetas, e crearon entre todos unha poesía adicada a Rosalía que escribiron no seu caderniño Feminino Singular.

Aquí vola deixo para que disfrutedes dela:

A ROSALÍA DE CASTRO

Tan delicada como unha rosa,

en Santiago floreciches;

as campás choraron,

cando en Padrón morriches.

Anos felices,

con Murguía viviches,

e cinco fillos con risas,

encheron os teus días.

Galicia na túa mirada,

as xentes na túa alma,

sempre loitando

máis o corazón chorando.

A negra sombra que nunca se foi,

contigo estivo ata o final,

enchendo de soidades e tristura,

a túa alma inmortal.

Alumnado do 3º ciclo

Visita de Xiana de la Peña

2011-11-24T09:16:00.000+01:00

Amigas e amigos:

O pasado venres 18 de novembro estiven agochado detrás do proxector para ver as fotos que nos ensinou unha amiguiña do Rato, Xiana de la Peña. A verdade é que quedei ben contento de estar alí, porque o Rato xa me comentara que a coñecera na Biblioteca do Fórum Metropolitano, onde traballa. É ben lindo saber que unha rapaza como ela é capaz de facer o que máis lle gusta, tanto a fotografía como a música, e, ao tempo, ter sido capaz de conseguir, tras moito esforzo, traballar no que sempre quixo, entre libros e soños, para que todos nós poidamos disfrutar do seu saber e da súa arte. Un pracer escoitarte e ver as túas fotos, Xiana!!Se queredes ver grande parte das súas obras, aquí as tedes.

UNHA GALEGA UNIVERSAL: EMILIA PARDO BAZÁN

2011-11-21T10:25:00.004+01:00

Picade no nome para saber moito máis de Emilia Pardo Bazán

Para que coñezades mellor e poder valorar o que representa na cultura e na literatura unha muller adiantada no seu tempo, feminista, progresista, coruñesa...amiga das máis importantes personalidades da súa época, aquí vos deixo un vídeo feito por uns rapaces falando dela.

UNHA EIRUGA MOI LARPEIRA...E VIAXEIRA!

2011-11-09T11:55:00.003+01:00

O venres 4 tivemos unha sesión do conto moi especial.

Aproveitando que temos unhas rapazas alemanas que viñeron a estar con nós e aprender cousas de aquí, eleximos con elas un libro que é moi coñecido en todo o mundo e lido en moitísimos idiomas.

O autor é o noso vello amigo Eric Carle e a historia trata dunha fémina que ten moita fame e lle acontece algo moi fermoso. Así que o escoitamos en galego, inglés e alemán, coa axuda das nosas amigas alemanas Katharina, Lisa e Laura.

De regalo, déixovos un vídeo que resume o conto coas imaxes orixinais do autor.

Maruja Mallo

2011-11-08T09:00:00.000+01:00

Amigas e amigos:

Unha das grandes mulleres do pasado século XX foi Maruja Mallo, que se elevou sobre todos os prexuízos que existían sobre a muller, e foi capaz de facer unha obra artística de grande nivel. Ainda que viviu 93 anos, nunca deixou de soñar e ser unha pequena nena grande, cos ollos sempre atentos a todo o que a rodeaba, o que non deixa de ser unha das mellores cousas que todas e todos vós debedes facer sempre, teñades a idade que teñades, non vos parece? Aquí vos deixo este vídeo con moitas das súas obras, para que disfrutedes ben dela:

MULLERES QUE METEN MEDO!

2011-11-02T11:36:00.000+01:00

O venres 28 foi o día de pasar medo. Cando os nenos chegaron á escola, o vestíbulo estaba terrorífico. O escenario cheo de cabazas-mulleres cun aspecto aterrador, na pantalla imaxes arrepiantes, lóstregos, tronos, morcegos e esqueletos,e escoitábase unha música que poñía os pelos de punta.
E ata Faustino, o nosos esqueleto, puxo unha perruca e quixo participar na festa de Difuntos, o Samaín.
Aquí vos deixo as imaxes dese día e dos seus preparativos.

'Chocolata', de Almudena Janeiro

2011-10-25T12:55:00.000+02:00

Amigas e amigos:

Desde o Bosque onde estou levo observado como moitas mulleres nos teñen enriquecido a todas e todos coas súas artes, saberes e soñares. O Rato e mais eu cremos interesante que vexades e comprobedes que as mulleres aportan sempre máis luz ao desenvolvemento da humanidade toda, facendo o mundo moito máis acolledor e cercano. Elas poden ser, e xa son, científicas, poetas, bombeiras, músicas, avogadas, magas, médicas, novelistas, profesoras ou pintoras, entre outros moitos exemplos. Hai pouco deixeivos aquí o de Guadi Galego, e agora déixovos este vídeo de Almudena Janeiro, co seu Chocolata. A cantar e bailar!:

2011-10-13T09:42:00.003+02:00

Amigo Rato:

Alégranos moito comprobar a boa relación que tes coa Ratiña presumida. Recollemos a suxestión que facedes sobre o proxecto protagonizado por mulleres e contando, por suposto, co teu apoio e colaboración ( moitas grazas polos libros que colocaches nos andeis do vestíbulo e que tentaremos incrementar) imos comezar un novo proxecto ao que temos decidido chamar FEMININO E SINGULAR.
Ata decembro imos aprender o importante papel que o xénero feminino desenvolveu e desenvolve na sociedade e tamén realizar un traballo que recolla a singularidade dalgunhas protagonistas da nosa historia.
Desfrutaremos lendo a Rosalía e Emilia Pardo Bazán, gozaremos coa obra gráfica de Maruxa Mallo, sorprenderémonos coa audacia de Sofía Casanova e descubriremos personaxes tan descoñecidos como Concepción Arenal, que foi quen de se vestir de home para asistir ás clases de Dereito na Universidade polo ano 1841.

Fomos á biblioteca e visitamos á Profe Bea

2011-10-10T09:15:00.005+02:00

O día 5 de outubro os nenos e nenas do 1º ciclo fomos á biblioteca da Sagrada Familia.

Alí escollemos os libros que máis nos gustaron para a hora de ler no colexio.

Aquí tedes a selección que fixemos e as mochilas especiais para traelos.

De camiño aproveitamos para visitar á profe Bea, que nos ensinou o seu cole novo e se puxo moi contenta de vernos.

Moita sorte profe Bea!

Canción de arrolar, con todo o cariño

2011-10-05T23:41:00.007+02:00

Amigas e amigos:

O Rato e eu andamos moi contentos ao ver que seguen nacendo irmás e irmáns de moitos de vós. É unha delicia vervos coidando deles, axudando aos vosos pais a atender e protexer a quen é agora como fostes vós mesmos hai moi poucos anos. Ben seguro que dentro de pouco andarán por aquí, no cole, buscando soños na biblioteca, consellos de Ana, Beatriz ou Marisol, ou preguntándolle a Jose como é que sabe debuxar tan ben! Así que, aproveitando que ELAS SON AS PROTAGONISTAS déixovos aquí este vídeo cunha canción para arrolalos coa voz de Guadi Galego, capaz de reter o sol na súa gorxa e facer que ande sobre os nosos soños:

E, por suposto, parabéns aos que tivestes e teredes irmás ou irmáns!!!

PROTAGONISTAS... ELAS!

2011-09-30T10:46:00.000+02:00

O outro día fun de compras coa miña amiga a "Ratiña Presumida" que quería un laciño da nova colección outono-inverno da moda galega.

Contoume que botaba de menos que neste cole fixeramos un achegamento a historias, poemas,cancións... onde o XÉNERO FEMININO fora o protagonista.

Daquela, fixen unha selección dos nosos libros, para poñer na entrada do cole, nos que as protagonistas son ELAS!

Espero que vos guste. Escribídeme outros títulos que vós coñezades.

O primeiro conto compartido deste curso

2011-09-20T12:44:00.000+02:00

O pasado venres escoitamos todos xuntos o conto dun pirata un pouco trapalleiro. É un vello amigo que fixo rir moito aos nenos.

Benvidos a esta nova travesía!

2011-09-15T14:03:00.013+02:00

Amigas e amigos: aquí vai esta canción sobre o Pirata Metepata, de Mamá Cabra. Benvidos a bordo desta nova travesía polo coñecemento e a curiosidade, que vos traerá sorpresas e moita sabedoría, ben seguro. Déixovos esta pequena xoia para ir disfrutando!

Unha aperta ben grande de Mateus!

COMEZA UNHA NOVA TRAVESÍA

2011-09-12T16:38:00.004+02:00

Estou feliz !Hoxe chegou a miña tripulación. Teño grumetes de infantil, marinería en 1º e 2º ciclo,e oficiais no 3º ciclo que marcarán o rumbo.
Faremos viaxes por mares e terras, coñeceremos xentes e lugares, aprenderemos contos e cantos...

Boa sorte! Chegaremos a bo porto e... "vento en popa a toda vela".
Eu, como rato que son, irei agochado na adega.

BOAS VACACIÓNS...E GRACIÑAS A TODOS!

2011-06-30T10:48:00.003+02:00

Desde o meu agocho na biblioteca, estou preparandome para as vacacións, e deuseme por pensar no marabilloso traballo que levamos feito todos xuntos. Por iso quero dar as grazas a todos os que entusiastamente me axudaron a argallar (para min) a mellor biblioteca do mundo. Aínda por riba da de Alexandría.
Grazas a todos os nenos do colexio, por xogar comigo e aprender todo canto lles mostrei. Ás familias por colaborar sempre que o necesitei. A todo o persoal do colexio, Joaquín, que traballou arreo fabricando os cadernos que eu lle mandaba, aos profesores, aos que fixen ler e estudar e investigar como nos seus mellores tempos de estudantes.
E especialmente GRAZAS ás miñas íntimas amigas, artistas, comediantas, escritoras, poetas, pintoras... mestras, JUANA e BEA,que souberon alumearme, facer da biblioteca a nosa casiña o meu lar, ensinarnos a voar con ás de paxaro, encheron os bosques de cores...
E todos os que por aquí pasamos, desexamosvos que a vida vos dea, polo menos ,todo o que vós nos soubestes dar.

2011-06-16T13:45:00.007+02:00

Hoxe tivemos na Biblio uns convidados moi especiais:
Eran as nenas e nenos que van encher a aula dos pequechos no vindeiro curso.

Resultaron un público estupendo... e casi non precisaron a mamá e papá!
Mirade que atentos escoitaron Carapuchiña!

Ata sempre, querido Juan.

2011-06-13T16:49:00.004+02:00

Hoxe queremos lembrarte, Juan Farias, con tristura e agradecemento.

Deixamos constancia na imaxe seguinte da túa presenza na nosa Biblio.
Nesta pequena biblioteca escolar os nenos e nenas coñecen moitas das túas palabras que, mesmo nalgún caso, eles ilustraron e...recitaron.
Porque a túa prosa é pura poesía.

Grazas, querido Juan.

A ilusión de amosar o traballo ben feito.

2011-05-31T21:44:00.004+02:00

Os Caderniños do tema están rematados.

Que ilusión velos todos xuntos e poder amosalos ás nosas familias!

Noraboa, nenas e nenos, polo voso estupendo traballo!

O venres tivemos festa!

2011-05-31T18:13:00.012+02:00

Achégase xa... a festa Do teu verdor!

2011-05-20T13:30:00.001+02:00

Queres bosqueArte??

2011-05-10T10:09:00.003+02:00

Queres bosqueArte?

Pensando en bosques e en arte, véuseme á cabeza un pintor... que me encanta!

Queres disfrutar da obra de Rousseau?

Velaí un video que nos achega aos seus cadros

Mateus propón un xogo.

2011-05-05T21:51:00.003+02:00

Amigos e amigas:
Deixástesme pampo con tantas descricións como fixestes de min! O caso é que, ben mirado, todas elas teñen algo do que os trasnos somos.

Sempre se dixeron moitas cousas de nós, botándonos as culpas de case todo (ainda que ás veces si teñen razón), pero, como saberedes, traballamos sempre na sombra, cultivando a imaxinación e dándolle a volta a demasiadas cousas que os adultos pensan que son serias, importantes: para nós, todo aquilo do que non se poida rir un ás gargalladas énos un pouco sospeitoso, e por iso defendemos en todo momento o dereito a soñar, xogar, aprender e sentir a realidade por un mesmo... nisto coincidimos, é verdade, o Rato e eu, como xa suporedes.

Pois teño aquí outro pequeno xogo para vós, relacionado co que estades tratando estes meses: imaxinemos como sería o animal máis estraño que encontraríades nun bosque. Terías ás, plumas, patas, pelos?

EnvÍo o meu:
O fendecastañas, un animal pequeniño, cun fuciño un pouco longo e duro, dez dentes, e uns ollos cor de mel escuro. Anda (ou andaría, existirá?) sobre catro patas un algo retortas, e, cousa rara, pasa a primavera e o verán durmindo nunha cova que vai furando ao acabar o inverno, despois de duplicar o tamaño do seu corpo con tanta castaña como comeu. Disque Álvaro Cunqueiro o viu unha vez na botica do seu pai, aló por Mondoñedo, pero acordou con el non mencionalo en ningún conto dos seus.

Que vos parece? Xogamos?

Visitamos as fragas do Eume.

2011-04-15T13:35:00.008+02:00

Unha pequena mostra da visita que fixemos a ese marabilloso espazo.

Momentos... Do teu verdor

2011-04-06T14:54:00.007+02:00

Temos un Caderno para o tema.

2011-03-29T09:54:00.009+02:00

O Rato regalounos estes cadernos, nos que imos traballar moito

A primeira dobre-páxina, para estudar a árbore: as súas partes, os tipos de follas... mesmo poderemos pegar unha folla seca e escribir todo o que saibamos sobre ela.

Sabemos que algunhas árbores varían moito coas estacións; outras non.
Tamén imos aprender o proceso do nacemento, desenvolvemento...e volta a empezar.

Un pequeno álbum de cromos: se escribimos o nome desas árbores e colocamos un debuxo das súas follas e/ou froitos, o Rato daranos cromos coas fotos das árbores para pegar cunha pestaniña en cada recadro.

E, por fin... o bosque!! sabemos que é todo un ecosistema. De seguro que, tras a visita á fraga do Eume, teremos moito con que encher esta páxina.

Unha páxina para viaxarmos por diferentes bosques do mundo e na que colocar palabras e imaxes que aprendemos nesa viaxe.

Ao final, a páxina que recolle libros dos que nace este caderno e que nos axudan a enchelo.

O pequeno bosque dos nosos pequenos.

2011-03-24T11:29:00.006+01:00

Os máis pequechos teñen un bosque de seu...que lles encanta!!

Coñecen o nome, a folla e o froito das seis árbores que nel viven.
Saben tamén que o bosque é un ecosistema completo e que nel habitan moitos animais (algúns só en bosques moi lonxanos...aínda que eles non se resisten á tentación de incorporalos á súa fraga).

Todo iso cóntano e amósano cheos de satisfacción!!

A Mateus, o noso trasno do bosque.

2011-03-18T13:07:00.004+01:00

Querido amigo:
Hai uns días pedíchenos que, xa que entre bosques andamos, tentásemos imaxinarte como personaxe que nun deles habitas.

Pois ben... aí che vai unha pequena mostra do que pensan os maiores.

Unha chea de bosques... e de Carapuchiñas.

2011-03-15T20:42:00.009+01:00

Entre os libros de ficción do tema, como é costume na Biblio, procúrase sempre un lugar para os contos clásicos e tradicionais e neste caso, para aqueles nos que o bosque está moi presente.

Ben vin eu aos pequechos trafegando especialmente co bosque da Carapuchiña. Velaí unha selección das que temos nos nosos andeis e que me gustan por diferentes motivos.

Entroido de bosque.

2011-03-11T12:29:00.006+01:00

Aí queda unha pequena mostra do que foi o noso Bosque de entroido o venres pasado.

Bosques de ficción.

2011-03-03T11:29:00.004+01:00

Bosques de conto.
De entre os que atopamos na nosa Biblio, unha selección dos que estamos a ler.

Libros divulgativos sobre bosques.

2011-03-01T20:43:00.002+01:00

Velaí algúns dos libros nos que andamos a consultar para aprendermos sobre os bosques.

No bosque de Carapuchiña.

2011-02-25T12:40:00.006+01:00

Co tema do bosque estamos tamén a achegarnos a moitos deses contos clásicos que tanto me gustan. De entre eles, talvez o primeiro no que pensamos é... Carapuchiña!

Mirade que ben o saben e o contan os pequenos do colexio.

Algúns, cos bonecos, no teatriño:

Outros, escenificándoo eles mesmos:

GRAZAS, Raioteca.

2011-02-24T11:25:00.003+01:00

Desde o CEIP de Andrade - Pontedeume, envíannos moi amablemente un enlace a unha Webquest que elaboraron sobre as fragas do Eume.

Anímovos a utilizala!! Este é o enlace. (Moitas grazas a Cristina e Encarna)

De paso, unindo as Fragas do Eume coa proposta de Mateus, preséntovos este libro que estou lendo polas noites na Biblio (durante o día non podo porque andan a lelo tamén os rapaces do terceiro ciclo na clase).

Nel, coñecín a Raquel, unha nena que viaxou coa súa clase ás fragas do Eume e trouxo, sen sabelo, un trasniño agachado na súa mochila... e se nos sucede o mesmo a nós cando vaiamos aló??

Mensaxe do amigo Mateus.

2011-02-24T10:19:00.002+01:00

Amigos e amigas:
Vexo que estes meses ides aprender moito sobre os bosques, onde levo toda a miña vida. O Rato estívome contando o proxecto, e eu ben vexo que estades contentos, e con gañas de aprender.

Así que, que vos parece se vos propoño un xogo?

Como creo que ainda non me vistes, nen sabedes moito de min, penso que estaría ben que contasedes como credes que é vida dun trasno como eu no bosque: onde vivo, que como, en que ando enredando, que roupas levo, que árbores son as miñas preferidas ou cales son os meus amigos alí (a ver se coincide coa realidade, xa vos irei contando).

Que, apetécevos?

Fragas do Eume

2011-02-21T12:55:00.007+01:00

Sei moi ben que o colexio está a encherse de bosques.
Mesmo estou enterado de os bosques protagonizarán o Entroido que se achega xa.

Sabedes vós que moi, moi pertiño de nós temos un bosque moi especial??
Así é!! Son as Fragas do Eume.
Lede, lede aquí e saberedes do seu inmenso valor.

Agora, convídovos a dar un pequeno paseo...para ir facendo boca, porque...desde o meu burato oín falar de que axiña, ao chegar a primavera, IMOS IR ALÓ todos os que neste colexio vivimos!! Así que, para irmos coñecendo o lugar que imos visitar,déixovos este enlace.

Que me decides? Gustouvos? A min... MOITO! tanto, que xa relambo os bigotes pensando na viaxe que imos facer!!

Nas mans do Avó Rato.

2011-02-08T11:18:00.007+01:00

Nas mans do meu Avó, no vestíbulo do colexio, deixei onte este libro (con estrela verde: matem/c. naturais) que se elaborou recopilando traballos e saberes no anterior proxecto, en Infantil.

Axiña irá a lucirse nas casas dos autores, para que as familias lean, xoguen pegando e despegando e así, aprendan sobre paxaros.

Hoxe, disfrutámolo todos desde o seu lugar preferente no vestíbulo.

Novo tema (información para as familias).

2011-01-25T11:14:00.004+01:00

Completamos o documental.

2011-01-21T13:30:00.005+01:00

Hoxe déixovos aquí os dous videos que faltan para completar o documental sobre bosques estacionais.
ÉSTE fala de bosques caducifolios e ESTOUTRO lévanos ao remate.

Deixo tamén estas imaxes do que anda a suceder no bosque do vestíbulo, que medra e vaise enchendo... mesmo con algún personaxe perigoso que se agocha tras a planta (Loreto tiña razón no seu comentario)

Claro que, se vos fixades ben, podedes descubrir algún outro ben simpático... como o Gruffalo!

Sodes bos adiviños!!

2011-01-18T10:33:00.004+01:00

Vexo que non precisades máis pistas.
Aínda así... mirade o que fixen esta noite no vestíbulo do colexio!!

Hoxe déixovos estas imaxes... e un novo capítulo do documental sobre bosques do mundo.

Comezamos outro proxecto.

2011-01-14T13:20:00.004+01:00

Xa vos advertín que ando a roer nun novo tema!

Hoxe déixovos este vídeo e máis este outro, como agasallo... e pista.

Sabedes xa sobre que imos aprender?

GRAZAS polos contos.

2011-01-12T13:24:00.005+01:00

No primeiro trimestre contaron para as nenas e nenos de Infantil varias mamás, papás...e mesmo algunha tía!

A todos, MOITAS GRAZAS.

No día da Festa.

2011-01-11T11:37:00.009+01:00

Antes de comezar cun novo tema de traballo (no que xa ando a roer) toca poñer fin ao anterior.
Velaí quedan unhas imaxes que recollen distintos momentos da festa das familias que celebramos en decembro, como remate do proxecto Con ás de paxaro.

Veciños alados.

2010-12-20T11:59:00.006+01:00

Hoxe tivemos aquí a Antón.
El, que tamén é do barrio e pertence ao grupo Habitat, ensinounos a ollar con xeito e descubrir aos nosos veciños alados.
Preparou unha presentación fermosa e axeitada para nós, que nos gustou moitísimo.
GRAZAS, ANTÓN!!

Poemas para adiviñar (6)

2010-12-17T13:22:00.000+01:00

O mércores temos Festa.

2010-12-15T20:55:00.003+01:00

Poemas para adiviñar (5)

2010-12-13T12:30:00.001+01:00

Dez letras ten
o nome deste paxaro.
Le e mira, mira e le
e serás quen de atopalo.

Voando...coa imaxinación.

2010-12-09T11:21:00.005+01:00

Nunha alfombra voadora, a bordo dun montgolfier, convertidos en Mary Poppins...
O cortizo estase enchendo de mil xeitos de voarmos...coa imaxinación!!

Poemas para adiviñar (4)

2010-12-02T11:33:00.001+01:00

Sete letras ten
o nome deste paxaro.
le e mira, mira e le
e saberás atopalo.

Poemas para adiviñar (3)

2010-11-30T19:54:00.003+01:00

Oito letras ten
o nome deste paxaro.
Mira e le, le e mira
e serás quen de adiviñalo.

Poemas para adiviñar (2)

2010-11-25T13:52:00.002+01:00

Catro letras ten
o nome deste paxaro.
le e mira, mira e le
e saberás atopalo.

Poemas para adiviñar (1)

2010-11-23T18:49:00.002+01:00

Cinco letras ten
o nome deste paxaro.
Le e mira, mira e le
e saberás atopalo!

Breve historia da aeronáutica.

2010-11-22T12:06:00.012+01:00

O venres, ademais de achegarnos ás figuras de Loriga e Piñeiro, o Rato deixou para cada un de nós na Biblio, outro caderniño.
É como un álbum de cromos, aos que debemos poñerlles pés de imaxe.
Seica os dous aviadores galegos, que semellan quedar fóra del, acabarán tendo un protagonismo especial neste libriñio, pero debemos traballar nel primeiro, para recibirmos a sorpresa.
Hoxe amosámosvos as súas páxinas, tal e como nolas entregou o Rato.

Galegos na historia da aeronáutica.

2010-11-19T13:03:00.003+01:00

Ademais de aprender sobre aves, tamén estamos a facelo sobre historia da aeronáutica.
Hoxe comezo por vos amosar dous retratos.
Corresponden a José Piñeiro e Joaquín Loriga.

O primeiro voou en 1913 e convertiuse no primeiro piloto acrobático de España.

Loriga realizou en 1926, nada menos que a travesía Manila- Madrid.

Que vos parece??

De castañas e vento.

2010-11-17T14:52:00.006+01:00

No magosto do venres pasado mesturamos castañas con xoguetes voadores.
Aínda que a destreza non era moita, o vento colaborou... e as castañas estaban riquísimas!

Mateus propón un xogo.

2010-11-16T18:18:00.003+01:00

Meus benqueridos amigos:
O Rato leva contándome desde hai semanas que está impresionado por todo o que estades aprendendo, e contoume tamén das aves e paxaros que andan poboando a vosa imaxinación, como nos pasa a todos os que os admiramos pola súa arte e sabedoría voadora.

E, penso eu, que vos parece se nos contamos todos como faríamos nós, os que andamos por terra e só somos capaces de dar uns saltos ben pequenos, para voar? Así, ao mellor ainda sacamos unhas boas ideas, ou, como mínimo, pasaremos un bon momento dándolle á cabeciña...

Mirade,
eu faría un traxe con todos os meus mellores recordos: iría meténdoos en cada peza de roupa, con delicadeza para que non se perdan e poidan conservarse coa súa beleza intacta. Despois diso, poríao por riba, e comezaría a pensar en todo o que sentín en cada un deses momentos, respiraría profunda e tranquilamente, e, nese momento, cando non soubese se as miñas pernas están sobre a terra ou dando voltas polas lembranzas maravilladas, sería cando iniciase unha carreira cara o horizonte, sen nada máis que as gañas de voar e estar cos meus mellores amigos…

E vós, como faríades?

Debuxando paxaros

2010-11-16T11:32:00.002+01:00

O xoves pasado compartimos unha sesión de arte, nesta ocasión dedicada ao debuxo.
Tentando imitar os fermosos cadernos de campo, saímos ao vestíbulo dispostos a aprender unha técnica para debuxar paxaros.
Agora estamos a colorear... con lapis de cores, por suposto.

Somos quen de VOAR!

2010-11-08T13:50:00.013+01:00

O venres pasado saín do meu burato para contemplar un espectáculo marabilloso.

No escenario, unha alfombra máxica.
Sobre ela, grupos de nenas e nenos que...conseguiron VOAR!!

Como facelo? É doado:
Pechando os ollos, acendendo a imaxinación... e cun pouquiño de axuda eléctrica e manual!

Aves de conto.

2010-11-04T13:40:00.004+01:00

O mesmo que fixeramos hai uns días cos libros divulgativos sobre paxaros, presentamos hoxe unha selección de aves de conto.

Son libros de ficción que viven nos andeis da nosa Biblio e que estamos a ler nestas semanas. No caso dos libros de poesía... hai tantos neste proxecto, que mellor facer unha escolma só con eles!

De cabazas, medo e paxaros.

2010-10-28T19:02:00.004+02:00

Quedan aquí algunhas imaxes que vin hoxe na escola, cando deixei o meu Burato da Biblio, para estarricar os bigotes.

Atopei o vestíbulo cheo de vida:
. No escenario, paxaros de mil formas e materiais, que foron chegando das casas.

. Nunha mesa, cabazas propias da época, enchéndose de plumas, peteiros, mesmo de paxaros enteiros.

. Ao pé dela, libros que están a ser lidos nas aulas, de Infantil aos maiores. Historias que falan do medo... ou que dá medo escoitar: Un pesadelo no meu armario, O Papón, Barbazul, Cando petan na porta pola noite...

E mañán, en vísperas de Difuntos... Qué pasará?

Na hora do conto, o venres pasado.

2010-10-26T11:46:00.007+02:00

Aí os tedes!

Cando tiñan seis anos, recibiron de mans dos seus daquela compañeiros maiores, un libro xigante (feito como actividade plástica)a partir do de Doumerc e Barnes.Eles usárono para contar no escenario e despois, gardámolo na Biblio.Estabamos traballando cun proxecto arredor das cores e Federico era un personaxe axeitado para o tema.

Agora, cando son eles os maiores, cóntano de novo. Federico é outra vez un personaxe axeitado para o tema das aves e foi o conto compartido do venres pasado.

Contadores e público estiveron encantados!(... e eu tamén)

Un agasallo do Rato.

2010-10-20T18:49:00.016+02:00

O Rato deixou hoxe un agasallo para cada un de nós: temos un caderno de ornitoloxía!
Nel imos debuxar, pegar, escribir algunhas das cousas que estamos a aprender sobre paxaros: como son, como nacen, algúns costumes, o estudio dun paxaro especial, aves de lonxe e de preto...
Quedan aquí imaxes das súas doble-páxinas.
Trae tamén unha selección dos libros da nosa Biblio cos que imos traballar.

Primeira carta de Trasno Mateus

2010-10-18T12:43:00.006+02:00

Amigas, amigos:
O Rato veu de visita polo bosque estes días e estivo contándome das actividades que ten previstas para este trimestre, e, casualmente, pasamos o día na nosa casa (fóra bruaba un vento terríbel) escoitando música mentres as horas se consumían na conversa.

Foi ao despedirnos cando nos decatamos de que esa música que escoitábamos tamén tiña que ver co tema que estades tratando: era a obra de Charlie Parker, un compositor americano de jazz.

Mentres tanto, déixovos un par de magníficas obras súas (cunha pista sobre a relación co tema), para que tamén saibades como pasamos o tempo no bosque: My old flame e Bird of Paradise.

Semella estar feita para o tema!

2010-10-14T13:53:00.002+02:00

Así é!

Esta película semella estar feita para o proxecto Con ás de paxaro.
Unha fermosa historia na que se mesturan aves e humanos voadores (entre outras cousas).

Paga a pena vela!

O proxecto deste trimestre.

2010-10-04T13:03:00.004+02:00

Xa temos tema novo!

2010-10-01T12:52:00.004+02:00

Xa temos tema para este trimestre.
Hoxe escoitamos xuntos o primeiro conto para presentalo: A merliña
Si, adiviñáchedes! estará cheo de paxaros, sobre os que imos aprender moito.
Pero non só iso.
Esta imaxe dá máis pistas:

Así é. Tamén imos traballar coa historia da aeronáutica, cos xoguetes voadores... co noso inmenso desexo de voar!

(por certo, a imaxe anterior está roubada dun libro hoxe descatalogado e que nunca debeu desaparecer: Leopold o la conquista del aire.

Despegamos!!!

2010-09-28T11:39:00.008+02:00

Despois de quentar motores, a Biblio...despega!
Como testemuña, estas imaxes:
O primeiro conto compartido, o pasado venres.
A primeira nai de infantil que se achega a ler.
Os máis pequeniños, incorporándose á lectura silenciosa.
Todo infantil, hoxe, mirando e nomeando paxaros...
Ai, que listos!!
Estes saben algo do tema co que imos traballar a partir do vindeiro venres!!
E vós? Sodes quen de adiviñar?

A primeira sesión compartida do curso.

2010-09-22T21:07:00.006+02:00

Hoxe disfrutamos da primeira sesión compartida no colexio, na que participaron tamén por vez primeira, os máis pequechos.

O escenario encheuse de maxia grazas ás marabillosas mans de Luisma. Gustounos moito a actividade ...e tamén vivila todos xuntos.

Dame nos bigotes que ao mellor o venres temos o primeiro conto na Biblio e que comezaremos a levar libros en préstamo.

ESTOU VIVIÑO!!

2010-09-15T13:50:00.005+02:00

ESTOU VIVIÑO...aínda que non faga barullo!

Por aquí ando, trafegando na Biblio, que axiña abrirá as portas aos seus usuarios.
Como cada ano, primeiro hai que revisar, tirar, colocar...
Tamén estou a preparar os carnés dos pequechiños que chegaron ao cole, ando a pensar no primeiro proxecto no que imos traballar este curso e comezo a disfrutar dos libros novos que van chegando.

Hoxe preséntovos os que empecei a mirar esta noite: cinco estupendos libros divulgativos, que imos ter nos andeis da Biblio.
Encantáronme!

Sol, auguiña... e un libro!

2010-06-30T12:47:00.005+02:00

Marchamos de vacacións!!
Na miña maleta levo, ademais do traxe de baño, algún destes libros que aquí vedes.

Todos eles e outros moitos entraron na nosa Biblio durante o curso que hoxe remata. A maioría chegaron aos nosos andeis desde os da libraría Quimbamba, escollidos polas mans sabedoras e exquisitas de María e Marta (ás dúas, moitas grazas).

Son algúns dos que máis nos gustaron aos nenos, ás nenas e a min. Por iso volos recomendo. Aínda que xa se sabe que valen tanto para persoas de tres anos como de cen, están ordenados de esquerda a dereita, de pequenos a maiores.

A todos... sol, auguiña e boas lecturas!!

Mateus vai de vacacións.

2010-06-29T12:20:00.003+02:00

Amigas e amigos:
Pasámolo moi ben este curso, aprendendo de todos os nenos que saben levar sempre a ledicia ás súas vidas, apesar de todo, e curioseando no corpo, desde o que sentimos o mundo. Para isto axudáronnos uns cantos pais, a quen lles agradecemos, outra vez, que compartan con nós o seu saber.

Despois veu a historia das casas, que é como dicir a historia dos nosos devanceiros e de nós mesmos: as máis antigas, os tipis, os iglus, os janokos e palafitos e, por suposto, as vivendas tradicionais xaponesas, sen esquecer os castelos.

Como ben sabedes, é moi importante seguir mantendo as gañas de aprender máis e mais, para o que vos recomendo que sigades lendo e lendo vós mesmos e cos vosos pais.Desde logo, podedes estar ben orgullosos do que aprendedes e do que transmitides aos vosos pais, pois (e este é un segredo que vos pido non divulguedes demasiado) todos, pequenos, maiores e criaturas do bosque, aprendemos de todos, e todos os días.
E lembrade tamén que ninguén vos poderá quitar nada do bailado.
Boas vacacións e a seguir descubrindo os pequenos misterios do mundo.

Saúdos desde o, tamén voso, bosque.

E ainda diu para máis!

2010-06-16T13:28:00.004+02:00

E ainda diu para máis!!!

Porque despois de botar semanas traballando sobre casas e fogares, cando chegou ao colexio unha caixa de tal tamaño... que habiamos facer con ela??

Pois... unha casiña, por suposto.

2010-06-08T09:30:00.002+02:00

Amigas e amigos:
Que linda a festa do outro día. O Rato contoume que se emocionou véndovos cantar e contar, recitar e saborear, e envioume fotos por internet (xa sabedes que no bosque dos trasnos andamos bastante adiantados nestas cousas, e nos comunicamos entre nós e cos amigos de maneiras ben contemporáneas...).
Pois aproveito para deixarvos aquí unha nova adiviña, a ver que tal vos vai con ela:

“Pequena como unha abella
e enche a casa ate a tella”.

Por se vos é de axuda, aquí quedan as versións noutras línguas (tamén sabedes que os habitantes dos bosques valoramos a diversidade como fonte de toda vida):

No sul do río Miño:

“Qual é a cousa, qual é ela
do tamanho de uma abelha
e enche a casa até à telha?”.

En castelán:

“Tamaño como una almendra
y toda la casa llena”.

En catalán:

“Una cosa com un gla
que per tota la casa va”.

En italiano:

“Io ci ho ‘na cosa
larga come um’amandola
che risciaro tutta la cámbora”.

E en francés:

“Qu’est-ce que n’est pás plus Gros qu’un oeuf
et qui tient toute la chambre?”.

QUE SERÁ, SERÁ?

Festa Miña casiña, meu lar.

2010-06-01T12:11:00.012+02:00

Abaixo quedan unhas imaxes que recollen diferentes momentos da Festa das familias que vivimos o pasado venres.

Se queredes velas mellor, ide picando sobre cada unha delas e volvendo atrás para pasar á seguinte.

Grazas aos Ratos de Monte Alto.

2010-05-25T10:30:00.003+02:00

ONTE FUN DAR UN PASEO
ALÁ ONDE VIRA O VENTO,
ONDE ALUMEA O FARO...
ÁS TERRAS DE MONTE ALTO!

Así foi. E de aló trouxen un fermoso agasallo que xa vive na nosa Biblio: esta árbore que vedes e que nós cremos que pertence a unha especie moi particular, a das árbores Papacontos.
Grazas, Amigos Ratos de Monte Alto!

Chega a Festa!

2010-05-21T10:14:00.003+02:00

O castelo.

2010-05-20T11:38:00.006+02:00

Vistas xa as catro casas, amosamos hoxe... o castelo.
É un traballo realizado polos nenos e nenas de 3º e 4º de primaria.

A última das catro casas.

2010-05-19T12:03:00.010+02:00

Esta páxina do libro recolle o estudo que os rapaces do terceiro ciclo fixeron sobre a vivenda tradicional xaponesa.
Velaí unha imaxe xeral e outras que amosan os detalles

A terceira das catro casas.

2010-05-14T10:52:00.012+02:00

A páxina do noso libro dedicada aos palafitos é un traballo feito en Infantil 4 e 5 anos.
Nela recollen o que xa antes fixeran sobre os janokos. A ilustración central é unha foto do palafito que eles construiran e o texto é o primeiro experimento público de escrita con minúsculas dos nenos e nenas de cinco anos.

Coñeceron aos warao a través de Maite, a súa mestra en prácticas, e dun video da rede; construiron un janoko; elaboraron un glosario de palabras na lingua indíxena e escoitaron, ilustraron e saben, un conto orixinario destas xentes.

Unha casa máis.

2010-05-13T11:21:00.009+02:00

Hoxe amosamos unha páxina máis do libro Catro casas e un castelo.
Nesta ocasión é o traballo dos pequechos da aula de 3 e 4 anos.

Coa axuda dalgún libro informativo e da rede, viron, escoitaron, imprimiron... e construiron este iglú.
Coñecen o proceso de construción dos mesmos, saben as súas diferentes utilidades e en que lugar do mundo se poden ver.
Quedan aquí estas imaxes da súa páxina para o libro xigante.

Catro casas e un castelo.

2010-05-11T12:23:00.016+02:00

Catro casas e un castelo é o título do libro xigante que entre todos andamos a facer. Velaí a súa cuberta.

Cada aula encárgase de investigar e logo elaborar unha páxina para el.

Hoxe presentamos a páxina feita no primeiro ciclo e coa que podemos aprender sobre tipis. Aí quedan unhas imaxes.

Adiviña de Mateus

2010-05-04T10:17:00.001+02:00

Meus queridos amigos:
Levo tempo pensando nalgunha adiviña para comprobar como andan os vosos reflexos. Encontrei esta que, tal vez, se relacione co tema que estades a traballar estes meses:

Que será unha cousa, cousiña,
Chea de noite e valeira de día?

A ver se dades sabido de que se pode tratar...

De paseo polo colexio.

2010-04-28T19:22:00.016+02:00

Cando hoxe saín do meu burato na Biblio para dar un paseíño matutino polo colexio, vin cousas que me gustaron moito.

Entrei primeiro na aula dos maiores e atopei os ordenadores cuns fondos de pantalla, postos polos rapaces, que amosan moi ben ata que punto andan metidos no tema de Miña casiña, meu lar.

Despois vin o vestíbulo do colexio cheo de casas de todo tempo e espazo, feitas de distintos materiais, planas e tridimensionais:
. Debuxos e pinturas de casas soñadas.
. Casiñas de papel e cartón.
. Iglús, un janoko, tipis, casas tradicionais de Xapón...

Aquí deixo algunhas imaxes.

2010-04-26T13:03:00.002+02:00

Hoxe déixovos outra selección de libros, neste caso de ficción, dos que temos na Biblio e que estamos a disfrutar neste tema de Miña casiña, meu lar.

Son libros nos que a casa está moi presente, en todas as súas páxinas ou só nalgunhas delas...e todos eles gústannos moito!

Libros informativos.

2010-04-22T11:08:00.002+02:00

Velaí unha selección de libros informativos que estamos a utilizar no proxecto que nos ocupa: Miña casiña, meu lar.

Casas...e arte.

2010-04-07T13:49:00.008+02:00

Talvez neste tema de Miña casiña, meu lar sería boa idea achegarnos á obra de Hundertwasser.

Propóñovos este video, que amosa algo da súa pintura e arquitectura. As imaxes van acompañadas da canción infantil I´m gonna colour a house.
Ao mellor tamén nós no colexio poderiamos colour our houses, inspirados polas súas...

Mateus lévanos a coñecer tres casas.

2010-04-06T10:17:00.002+02:00

Amigas e amigos:
Seguro que en moitas casas encontraredes cousas sorprendentes. Aquí vos deixo os xoguetes que se poden ver na de Pablo Neruda.
E tamén vos recomendo este paseo pola casa de Frida Kahlo en México.
Por se non vos apetece ir tan lonxe, tamén se pode dar unha volta pola casa de Rosalía de Castro en Padrón.
De todas maneiras, hai cousas que só poderedes atopar nas vosas propias casas, con todo o que levades vivido nelas. Por iso é tan importante coidar delas, porque hai unha parte enorme de cada un de vós que as leva incorporadas dunha maneira inseparable.
Saboreade, pois, os momentos nelas pasados, porque vos transportan sempre nas ás da imaxinación e da memória cara o interior do voso corazón.

Poesía ilustrada.

2010-03-26T10:22:00.010+01:00

Dentro de Miña casiña, meu lar e como homenaxe a Rosalía, en agradecemento polo verso que nos dá título para o tema, no terceiro ciclo estamos a traballar coa súa poesía.

Sabemos e imos recitar algunhas das súas estrofas e mesmo nos atrevimos a ilustralas. Velaí unha pequena mostra do traballo.

Mateus envía enlaces.

2010-03-23T09:40:00.000+01:00

Amigos e amigas:
Vexo que andades investigando nas vivendas de todas as épocas. Eu, como ben sabedes, ando sempre dándolles voltas ás cousas, e encontrei algo dun vello amigo das palabras, que construiu esta pequena xoia para todos os nenos, lembrando a súa estancia en Colombia.
A ver que vos parece, porque hai que lelo e velo detalladamente á vez para tirarlle o mellor proveito.

Texto colectivo.

2010-03-18T11:08:00.006+01:00

Hai unhas semanas Mateus comezou cunha proposta de texto colectivo sobre casa con portas e chaves.
velaí o resultado tras as diversas aportacións:

Era unha vez un país ben lonxe, onde vivían dúas nenas nunha casa chea de segredos.

Os segredos vivían agchados detrás de tres portas: Había unha porta grande, outra mediana e unha portiña pequena, para os segrediños. A porta pequena tiña a fechadura xa moi desgastada, porque segrediños hai moitos na vida.

Ningunha das nenas abrirá nunca a porta grande, a dos grandes segredos.Aquel día as nenas atoparon na eira, baixo o cabazo, unha chave grande, moi grande, que semellaba corresponder coa fechadura da porta dos segredos grandes.
Correron ata a casa e subiron ao faiado, onde estaban as tres portas. Carmiña, a maior das dúas, meteu a chave no furado e...

O pai das nenas estaba aterrado!!Tiña moitos segredos pero non sabía en quen confiar.Entón abriron a porta e todo o viron os segredos: Un era unha caixiña que tiña unha chave pequeniña, é entón comprobaron todos que as chaves, fose cal fose o seu tamaño, servían todas para abriren todas as portas: a pequena, a mediana e a grande.

Foi nese momento, despois de se ollaren as nenas, cando se percataron de que as chaves que se usan con toda a forza dos soños e a intelixencia entran en todas as portas, e no las abren para sempre.

A primeira vivenda,,, a cova.

2010-03-16T10:30:00.009+01:00

Nos pasados días, en Infantil, traballaron aprendendendo sobre a vida humana cando as casas eran... as covas!

Saben de alimentación, vestido, pintura rupestre...

Velaí unhas imaxes que recollen parte do proceso e tamén este video, que foi un dos materiais que usaron para documentarse.

A casa que Jack construiu.

2010-03-11T10:53:00.002+01:00

Na biblio temos este libro.
Témolo en inglés e tamén en español.

Trátase dun conto acumulativo moi divertido. Queredes aprendelo?

Podédelo facer usando estes enlaces: este primeiro video, ou ben este outro, no que contamos cantando.

Construíndo un Janoko.

2010-03-09T12:35:00.006+01:00

Maite está a facer as súas prácticas de mestra con nós, na aula de 4-5 anos.

Ela naceu en Venezuela. Por iso dentro do proxecto Miña casiña, meu lar estamos aprendendo con ela sobre os indios Warao:escoitamos un dos seus relatos, disfrutamos dun video, construimos un Janoko e estamos a elaborar un glosario con palabras como curiara, chinchorro, torotoro, morricoy...

Hoxe convidámosvos a todos a saber máis a través deste video.

Vaia sorpresa, amigo Rato!!

2010-03-08T12:25:00.011+01:00

Cando chegamos ao colexio hoxe e entramos na Biblio... MENUDA SORPRESA!

Atopamos toda unha casiña construida arredor do teu burato. Gústanos moito e estamos encantados de poder entrar na túa vivenda.
Claro que... seguimos sen ver que agachas nese teu burato, a carón da escaleira!!

E, dinos amigo Rato, iso de facerte unha casa... non terá algo que ver co tema que andamos a traballar?